Nýsköpun á aðventunni - Matvælafyrirtæki kynna íslenskt góðgæti um helgina

Íslenskir matvælaframleiðendur taka höndum saman í tilefni af Ári nýsköpunar og kynna fyrir landsmönnum íslenska matvælaframleiðslu helgina 4.-5. desember. Kynning verður á jólamat og drykk í Vetrargarðinum Smáralind þar sem kjötiðnaðarmeistarar úrbeina hangikjöt sem verður gefið mæðrastyrks­nefnd til úthlutunar fyrir jólin. Kjarnafæði verður að sjálfsögðu á staðnum og gefur gestum og gangandi hangikjötssmakk.

Kaffi­brennslur taka á móti gestum á meðan starfsmenn þeirra pakka jólakaffinu sem síðan ratar inn á heimili landsmanna og í bakaríum verður tekið á móti gestum með kaffi og smákökum (sjá meðfylgjandi dagskrá). Ölgerðin, Jói Fel og Gæðabakstur/Ömmubakstur bjóða landsmönnum heim, fræða gesti um starfsemina og bjóða upp á veitingar.

Senn líður að jólum og hver getur hugsað sér jólin án íslenskra matvæla? Hangikjöt og laufabrauð, flatkökur, smákökur, hamborgarhryggur, grænar baunir, rauðkál, kók og malt og appelsín. Þeim fer fækkandi sem matreiða frá grunni, hnoða laufabrauðsdeigið, sækja hangikjötið út í reykkofa eða sjóða niður grænar baunir. Íslenskur matvælaiðnaður hefur leyst þessi heimilisstörf af hólmi.